Fieh
Sjumannsorkesteret Fieh, under leiing av frontkvinne Sofie Tollefsbøl, tok Norge med storm med soulfunkgladlåta “Glu” i 2017.
I 2019 følgde dei opp med det Spellemann-nominerte debutalbumet “Cold Water Burning Skin”, som både gav stjerner i augo på kritikarane og mykje internasjonal merksemd.
Bandet, eller orkesteret, som det kanskje er riktigare å kalle dei, let seg ikkje lett sjangerplassere. Dei blandar soul, funk, r&b og psykedelika, og resultatet er tvers gjennom originalt, uventa og unikt.
Dette er musikk for hjartet, underlivet og føtene – klarar du å stå stille på konsert med Fieh må du nesten vere fullstendig tonedøv eller altfor skamfull over eigne dansemoves til å syne dei fram offentleg. Men ikkje ver det, då! Når orkesteret dreg i gong “Grendehus Funkadelic”, den fyrste smakebiten frå si komande plate, så forventar me at golvet på Sundrehall gyngar i takt med blåsarane, fløytene og bassen. Dette er musikk til å bli glad og tidleg våryr, av!