Synne Vo
“By og land, hand i hand”, skriv Synne Vo på biografien sin på Spotify, der over 100 000 månadlege lyttarar høyrer henne synge fengande popsongar om oppveksten på bygda, om å vere ung, full og singel – og å sitte heime og ete “spagetti for to” og vente på ein gut som aldri dukkar opp.
Eigentleg heiter ho Synne Vorkinn og kjem frå Lesja i Gudbrandsdalen. Når ho no har vorte heile Norges nye popyndling med nære, ekte tekstar på nynorsk og dialekt, er det fordi ho formidlar ungdomstid og kjærleiken på ein universell måte, som dei fleste kan kjenne seg att i, uansett om dei bur i bygda eller byen, og er seksten år eller førtiseks. Det er ikkje tilfeldig at ho er spelelista på både P3 og P1 med “Seksten”, nei. Me tippar også at låta går på høg rotasjon på mange vorspiel for tida …
Synne Vo har med andre ord ei strålande framtid foran seg, og me trur at ho om ikkje lenge dyttar karar som Daniel Kvammen, Sondre Justad og Kjartan Kristiansen ned frå den norskspråklege poptrona. Få med deg Synne på SundreBall, du, så kan du med handa på hjartet si: “Eg såg ho fyrst!”