Great Tide
Hardtarbeidande Great Tide har på kort tid rokke å singel-debutere, gjennomføre to turnéar, og vinne Uhøyrt-finalen på Bryne, og ikkje nok med det: I oktober 2024 slapp bandet debutalbumet «Daywatcher» med strålande tilbakemeldingar.
Det sydar og boblar godt i den musikalske gryta der Great Tide har hivi oppi energisk 70-talls rock ispedd amerikana og krydra med ein god porsjon blues. Her anar me ingrediensar henta frå Bigbang, Creedence Clearwater Revival, Free og Lynyrd Skynyrd, og jammen har dei ikkje blanda inn eit par duvelege skeier med fleirstemt gitar a la The Allman Brothers Band. Altså musikk som treff unge hallingar i alle aldrar midt i hjarta, ryggmargen og øyregangane.
På turné rundt om i landet trollbind Great Tide publikum med rett-fram-rock i sine karakteristiske kvite snikkarbukser, som symboliserer hardt arbeid, stort talent og vaskekte speleglede som grunnlag for å bli entreprenør på høgde med dei beste.
Og anerkjente byggherrar skal dei bli. Bandet har trua på at dette kan nå så langt som helst. Me gler oss til at norsk rock sine ferske fagarbeidarar tek turen til SundreBall og vil banke i gjennom sine ferske låtar for uss. Ta på deg snikkarbroka du også, stem luftgitaren og bli med på musikalsk dugnad i lag med Great Tide!